A    C O M P A Ñ Í A

Incendiaria é unha plataforma artística nacida en 2014 que fundamenta o seu traballo na investigación e na creación escénica contemporánea.

 

No 2014, traballan a partir da peza Memoria do Incendio, de Vanesa Sotelo para reparar na construción do personaxe a partir do traballo co corpo.  No 2016, emprenden un laboratorio propio de creación e investigación do que xurde a peza Contramateria, unha proposta fundamentada no estudo do tempo en diversas accións escénicas. 

 

No 2018, Incendiaria estrea a súa primeira montaxe profesional, Eila, coa que forma parte da programación do Vigo en Bruto 2018 impulsado polo Teatro Ensalle. Esta é unha montaxe que ten como punto de partida unha serie de poemas de Rosalía de Castro musicados por Davide González. A liña de traballo e de investigación con obxectos,co estudo dos tempos, coas reaccións e coa presenza escénica foron as xeradoras dunha dramaturxia visual e sensorial onde a hibridación de xéneros como a música, a performance, a poesía ou o movemento, convivían entre si, facendo de Eila unha proposta escénica-musical que ía alén do recital.

Outras propostas escénicas da compañía son Laica 3991: paisaje sen horizonte. Esta última, froito da encarga que a UVIGO lle fai ás creadoras da compañía para as IV Xornadas José Saramago.

En Abril de 2019, Incendiaria inicia o proceso creativo do seu segundo espectáculo profesional, Microspectivas dun marica millennial, apoiado polo Colectivo RPM a través das III Residencias Paraíso (2019). MMM é unha coprodución do Centro Dramático Galego e tivo a súa estrea o 19 de Xuño de 2020 na Sala Ingrávida do Porriño.

Microspectivas dun Marica Millennial, acadou 4 nominacións aos XXV Premios de Teatro María Casares: Mellor Iluminación (Laura Iturralde), Mellor Texto Orixinal (Vanesa Sotelo e Davide González), Mellor Actor Protagonista (Davide González) e Mellor Espectáculo.

O día 9 de Setembro de 2021, finalmente, Microspectivas dun Marica Millennial, era gañadora de 2 dos premios María Casares:

Mellor Texto Orixinal (Vanesa Sotelo e Davide González)

# Mellor Actor Protagonista (Davide González)

En Maio de 2021, as integrantes de Incendiaria traballaron coa compañía portuguesa Teatro Art´Imagem poñendo en escena o espectáculo Especies Lázaro. Unha proposta que incide nun dos temas recurrentes incendiarios como é a memoria, desde un punto de vista ecolóxico e político. Vanesa Sotelo escribe e dirixe esta montaxe internacional que se estreou na Quinta da Caverneira- Maia- no mes de xuño.

En retrospectiva, a finais do 2020, Incendiaria, xunto coa compañía A quinta do Cuadrante, gañaron o II Certame Manuel María de Proxectos Teatrais impulsado pola Fundación Manuel María de Estudos Galegos coa proposta escénica do texto do autor chairego A lúa vai encuberta.

A estrea do espectáculo realizouse no Teatro Principal de Ourense os días 10, 11 e 12 de Setembro de 2021 cunha moi boa acollida por parte do público.